أذكر في تدوينه سابقة كنت كاتبه ان باقي شهرين على امتحان الليسن ( رخصة القيادة) ..وسبحان الله مرت الأيام بسررررعة
بالبداية كنت أعد الأيام والليالي والساعات والدقايق ،، لكن مع الأيام مشاغل الدنيا نستني السالفة …
بعد يومين امتحاني النهائي للــليسن ، وطبعاً قبلها كنت ممتحنه باركن وكراج وتقييم مدينه والحمد لله نجحت فيهم
ولي شهرين موقفه تدريب،، لما شفت ان الوقت تداركني ومابقى شي على الامتحان على طول شغلت حالة الطورئ
واتصلت بالمدربة لكن طلعت مو فاضيه لي وجدولها مشغووول ، رحت وعملت اتصالات لين مالقيت مدربه ثانيه،،
بصراحه ماتفألت لما كلمتها لكن قلت يالله خير، والصدمـــــــه كانت لما جاتني البيت ومرتني……. طلعت اني شايفتها قبل بمدرسة التدريب
ووقتها على بالي انها ام بنت تتدرب ويانا ماتوقعت انها مدربه ابددددن، تذكرني بأبلة الفيزياء …
بدت تعلمني من الألف إلى الياء،، وهنا كانت الطامه الكبرى،، انا كان ودي أقول تراني عديت الألف والباء إلخ…..
وأسلووووبها اختلف عليه بالمررره،، صرت كأني اتعلم من جديد،، المشكله ماقدرت اتغير وماغير الا اتهاوش انا وهي
تقول يمين اقول يسار،، على بالها اني عنيدة لكن الحكايه ان الأسلوب اللي تعلمت عليه واللي مر عليه شهرين ما يتغير في يومين
المدربة: انتي بتشتغلي ايه ووين؟
أنا : في الجامعة
المدربة: وراتبك كم ؟
أنا : زين الحمدلله
المدربة: يعني كام؟ خمسه سته ؟
أنا : هاو !!!!!! الله يسلمج قلنا زين الحمدلله
المدربة: ماهو أصلا الخ الخ الخ
أنا :اها طيب
المدربة: هو اسم المدربة اللي كانت بتدربك ايه؟
أنا : اسمها فلانه << ندمت طبعاً
المدربة: وكانت بتاخذ منك كام؟
أنا : نفس اللي تاخذينه
المدربة: ماهو فيه اللي بياخذ 70 على الحصه
أنا : ايه ادري وكلها ارزاق
المدربة: طيب هيا تابعة لأنهي مدرسه؟
أنا : والله ماعرف مادققت
وبدأ شغل الحريم اللحين
المدربة: ايه ده دنتي لفاتك وحشه أوي هي ماكانتش بتعلمك لفات ؟؟
أنا : امبله <<< اشلون اجل نجحت بالامتحان الأول !!
المدربة: لفي ايدك بسرعه مره وحده
أنا: والله سكان سيارتج ثقيل حشا أسوق شاحنه مو سيارة
المدربة: يااااه من دلع البنات اليومين دووول
أنا: ………………
المدربة: يالله ادخلي باركن ، ،،
لالا البارك وحش أوي
أنا : *_*
المدربة: عيدي ادخلي بعد السيارة
أنا: اوك
المدربة: غلط .. وئفتي ليه ؟؟ ادخلي من دون ماتوأفي
أنا: اشلون ادخل ترا الريال مر من جدام الباركن …اصدمه !!!
المدربة: قولي حاظر يا أبله
أنا: *_* & *_*
المدربة: لالا هي دي ماكانتش بتعلمك ؟
أنا: (فهمت الموضوع اللحين السالفة فيها مدربتي الأولية)
المدربة: انتي من وين عرفتيها
أنا: رفيجتي دلتني عليها
المدربة: هيا اسمها إيه؟
أنا: فلانه <<< في نفسي الله المستعان
وهذرة ماشاء الله تبارك الرحمن طول ماأنا اتدرب ..
ومثل ماتعرفون المتدرب لازم يلتزم بقواعد السير بالحرف،، لف راسك يمين يسار ورى قدام،، دق إشارة قبل أي حركه وياذي الاشارة
يعني احيان الشارع يكون فاضي ،، أدق إشارة لمنو؟؟ بس هم بعد خل أدق إشارة عشان لاسمح الله كانت فيه وراي مخلوقات غير بشرية يعملون حسابهم 
وهي معروفة علامة سيارة التدريب عندنا ( ت L ) تنقرى لسا تيس 
بس كله في مصلحة المتدرب، عشان إيدة تاخذ على الإشارة وماينساها بالإمتحان
وبالأخير أنا إستفدت من المدربة الأولى وحتى الثانية رغم كل شي استفدت منها شغلات حلوه..
وبعد يومين يا تصيب يا تخيب
أتوقع لو مكانك قلت لها بليز أبي هدوء
الله يوفقك و ييسر لك
و ننتظر تبشرينا إنك أخذتي الليسن
اهلااااا ..اكيد عرفتيني
الله يوفقج ياااااااااربي وتاخذين الليسن ونحتفل احتفالا لايضاهيه احتفال
بس لا تنسين الوعد باللفه حقتي انا وتوته هههههههههههه
وعقبال ليسن الطيران بعد >>>طموحه
أفنان: ان شاء الله أنجح، لان السالفه طوّلت… قبل عادي الواحد ياخذ الليسن من المرة الثالثة والرابعة وهو مرتاح لان المواعيد كانت متقاربه بين كل امتحان واللي بعده اسبوع بالكثير … لكن اللحين مصيبة بين الامتحان والثاني شهرين وأكثر .. شد أعصاب …..
فرح : حيا الله فرح .. تو مانورت المدونة
:)
مشكورة على الدعوة الحلوة وإن شاء الله بنسوي حفلة
وأنا على وعدي بس انتوا تعالوا الامارات
أما الطيران .. ترى البارحة وانا اتدرب جت في بالي الفكره وقلت باقي الطيارة
جاني إحساس كأني أسوق طياره
ربي يسهلها عليك يا ملامح
انا لي اسبوع تقريباً أتدرب على يد زوجي توني أمشي على التاني والتالت وماني قادرة أسيب الربكة لسة.. باقي أتشجع شوية وأتدرب على الباركينج والاشارات والريوس.. ربك يسهلها
لا فرحينا عاد بالنتايج وما عليك برسل لك جالون بنزين كل سنة
أسماء: بس جالون واحد
ماعندهم نظر صح 
حياك الله يا أسماء نورتينا ،، ويلا تدربي عدل بالأخص الباركنج ،، كله يقولون البنات مايعرفون يبركنون